بسم الله الرحمن الرحيم
والصلاة والسلام على محمد واله الطيبين الطاهرين واللعن الدائم على أعدائهم أجمعين
بدا البرد في الاسكندريه، وبحكم غلاء الكهرباء فان سخان الغاز يستخدم في اغلب الشقق بدل السخان الكهربائي ( البيلر)...
بس مشكلة سخانه مشكله! تصدقون إني ما أتسبح بحمام شقتنا والسبة هالسخان , مشكلته إن الماي بارد وإذا حطينا على الحار يضبط شوي بس لحظات من الراحة الاستجمام تحت الدوش يغشك مرة وحده ويصير حار بشكل رهيب وثم يرجع الى حالته !.
ملينا واحنا نييب واحد يصلح هالسخان، والمشكله انه السباك ( الصحي بالمصري ) كل جيه لنا ياخذ 30 جنيه واحنا المساكين ندفع على امل انه يتصلح ، مرة يقولنا البطاريه خالصه ، ومرة يقولنا " ان زبطته كده ، محدش يأرب ناحيته !" واحنا نصدق بعد ، ما (نأرب ناحيته) وهم ماكو فايده ، ولمن ظهورنا استوت على الآخر لجأنا حق أصدقائنا الجيران الي ماعندهم مشكلة بسخانهم ، فصارت السباحة بالحسره علينا , وقمنا نتمنى ان يكون عندنا مثل الي عندهم ، ترى عباله ... كل ما واحد يبي يتسبح اخذ فوطته واهدومه وشطه وعطره وكل شغله وراح تسبح بره!
باختصار ماندري العيب بالسباك ولا بالبطاريه !
لاتتوقعون اني اقصد مجلس الأمه بـ ( السخان ) ، والحكومه (بالبطاريه ) الي ملينا وإحنا نبدلها بس ماكو فايده ! وترى النواب مو ( السباك ) إلي يبدل البطارية ويضحك علينا ، و دول الخيج اهمه ( الجيران ) الي نتمنى سخانه يصير نفس سخانهم !
يـبـا من الآخر ... أنا ما اقصد الحكومة والمجلس الي غشونا مثل السخان من هدوء واستجمام ... لي عاصفة و أزمه !
والسلام ختام
- ما عليه يالربع ...سخانه يفشل مو الحبيب قالنا محدش يأرب وأم ابراهيم * من ذاك اليوم ماقربت منه ( تبيها من الله )!
* ام ابراهيم : هي الشغاله المبجلة الي المفروض انها تشتغل عندنا ... بس نظرا لعمرها المليوني ( الله يحفظها ) اهي تقعد على الكرسي واحنا نشتغل ، وآخر الشهر تاخذ معاش!
هناك تعليقان (2):
لوووووول
تقدر تستعين بخليفة حق الماي الدافي ، عشنا تجارب معاه في المخيمات السابقة ..
أشوفك بالكويت تطلّع حرتك وكل يوم تتسبح p:..
اما على طاري ام ابراهيم ، فـ محد معيشكم غيرها .. بتطلع حرتها فيكم قبل لا ترجعون الكويت
ما بقى شي ، تحمّل D:..
موفق يا رب
لا يبا ما نبي سخان ماي ..
حلاته تغتسل بماي بارد
إرسال تعليق