(لو أنا رئيس وزراء جان صرخت :...إذهبوا فأنتم الطلقاء!)

بسم الله الرحمن الرحيم

طلعت نتعشى أنا وصديقي عبيد ذاك اليوم بسوق المباركية, واحنا نستمتع بالجو الحلو قلتله: "الله لو الكويت ترد مثل قبل, ماكو مشاكل وماكو مصالح والكل على قلب واحد", عفس ويهه وقالي: " شفيك بوحسن اصلا الكويت بتجيها أيام أحلى بكثير من اللي طافت , انطر خل يشيلون رئيس الوزراء ويعينون رئيس وزراء من الشعب وتشوف الخير بعد 5 سنين بس!! تخيل روحك انت رئيس الوزراء علي, صج وناسه,وتخيلني نائب بالبرلمان" .

أهو من قالي هالشي انا قلبي انشرح واستانست من كلمته, وقعدت اتامل إني رئيس وزراء, طرت من الفرحه وطرت بعالم خيالي وتخيلت روحي قاعد امشي بالكويت عام 2015 وانا رئيس وزراءها مو أي مواطن عادي!, ومعاي النائب صديقي عبيد.

1- وانا اتمشى مريت صوب ساحة الصفاة ولا أشوف محمد الجويهل مصلوب ومحد يساعده!! قلت حق عبيد :" خل نساعده", قالي:" 500 شخص طقه وربطوه هني وماتقدر تحاسبهم, واذا حاسبتهم راح استوجوبك!!" .

2- ضاق خلقي من الي شفته وخليتهم ورحت اتمشى لين وصلت فريجنا , ولا اشوف 4 صبيان لاحقين شرطيين ويحذفونهم بصخر, قلتلهم: " ياجماعه هذيل شرطة ليش ما يدافعون عن نفسهم , قالي: " عبيد بس هذيل اليهال كويتيين والشرطة مايصير يطقون المواطنين!! واذا قلت كلام غير هالكلام استجوبتك!!" .

3- وذاك الصوب كانوا 8 اطفال يسولفون مع بعض بس كلام بذيئ, من الي قالوه( كلب, حصان , حمار, بيتكم بحي الطرب , ابوك ساقط لاقط,....الخ) كرمكم الله , مسكت زعيمهم وقلتله:"عيب بابا, هذا كلام وصخ" , قالي: " انت شكو, عمي عبيد يقول عادي وكل مره يقول هالكلام اهو و ربعه" .

4- وصلت بيتنا ولا في 4 بنغالية قاعد يصلون جماعة بمسافط سياراتنا!!, نطرتهم يخلصون وقلتلهم : " بابا باجر لا تييون تصلون هني بسفط سيارتي" , نط لي بنغالي منهم قالي:" بابا مو كيفك هزا مسجد مايصير انت يشيل وباجر كفيل مال انا يبي يجي يسوي كيرب هني!! , دقيت على عبيد وقلتله:" عبيد هذا بيتنا" , قالي:" دام صلوا هني ماتقدر تشيلهم ,وان شلتهم هايف بيزعل!!وجذي راح يستجوبك وانا وياه!!" .

5- رحت البنك وسحبت 10دنانير بشتري عشى حق البيت , شوي ولا عبيد دق علي وقالي: " بوحسن وصلنا مسج انا والربع انك سحبت 10 دنانير من الوطني, شبتسوي فيهم!!" ,قتله: " ياسلام, ماني قايلك,شبتسوي؟ ,قالي: " مو كيفك , بتقول ولا استجوبك؟!!" , قلتله وامري لله.

6- دشيت البيت ووكلت عيالي وبطلت التلفزيون على تلفزيون الكويت واي شي احاول ادور قناة كويتيه بالرسيفر ماني لاقي!! دقيت على عبيد قلتله:" شصاير؟" , قالي: " صكرنا كل قنوات الاعلام الفاسد وفي مشروع نصكر تلفزيون الكويت ونحوله شبرة!! وذا اعترضت استجوبناك" ,عصبت وقلتله :" عبيد كل شي قلتلي راح نستجوبك!! لي متى يعني؟؟!" , قالي : " قالي لين نشيلك, شنو انت احسن من الشيخ ناصر المحمد؟!" .

هني صحيت من خيالي المرعب ,وقلت حق عبيد:" الله لا يجيب ذاك اليوم الي يكون فيها رئيس الوزراء شخص غير الشيخ ناصر المحمد , والله ينصره على ربعك ياعبيد , و5 يناير انشالله يكون يوم انتصاره على ربعك" .

*********

ما أجمل العمل الإسلامي وما أجمل التنافس الذي فيه , إن لم يشوبه مصالح وصعود على أكتاف الغير , ولا توهين هذه الشعيرة العظيمة من خلال بعض السلاكيات اللامسئولة من البعض...

"رضواننا .. منبع للفضائل"

عنوان مقالي القادم ,الذي سأتحدث به عن عشقي الكبير ((مؤسسة الرضوان الشبابية))...

ترقبوه...