مسجد ... بس كيربي!!

بسم الله الرحمن الرحيم

مسجد... بس كيربي!!

الله يهداه صاحبنا هايف استعجل وقدم استجوابه ,, خو لو ناطرني أقوله اسباب هدم الكيربي الي يقول عنه مسجد جان قلتله بس مافيه صبر الهايف.

صج إنه أهو قدم استجوابه وخلاص ماكو فايده لكن أنا بقوله الأسباب يمكن يحس ويسحب استجوابه...

شوف يا هايف,,

الموضوع ومافيه أنه البلدية ماشالت المسجد بس لأنه مخالف, هم لانه عندهم عدة أسباب وجيهة خلتهم يزيلون هذا الكيربي على أمل أنه صاحب الكيربي يستحي على وجهه ويسوي مسجد بنيان..

1- أول سبب طال عمرك أهو انه مثل ما إنت عارف أنه العماله الوافدة زادت عندنا بالكويت , وخصوصاً البنغالية!! وهالفئه من كثر مايحبون الأسلام دايماً العصر ينامون بالمساجد ويتسدحون , و البلدية شافت الصيف قرب, يعني حر .. يعني ماكو عازل .. يعني التكييف مايلحق .. فشافوا أنه الحر ممكن يؤذي العمالة الوافده الي راح تنام , كذلك تأذي المصلين الي راح اييون يصلون المغرب ...( فكروا شلون يتأذون , لأني ماراح أقول).

2- السبب الثاني يالحلو إنه إمام المسجد تقدم بشكوه بأنه مو قادر يركز يالآيات الي يقراها بسبة الازعاج من التقحيص وهرن السيارات, ناهيك عن إذا طق مطر ... فصوت نقراته على الكيربي مو صج.

3- أما السبب الثالث والوجيه هو أنه يهال الفريج دايماً العصر يحبون يلعبون كره بالبراحه, فبالغلط مرات واحد يضيع القول ويشوت الكره على هالكيربي , وصوت طقه الكره على الكيربي موووووو صج, حده يفزز وقوي, فهذا يزعج المصلين وكذلك النائمين من البنغالية وغيرهم.

4- أما السبب الرابع يابلبل هو أنه البنيان أقوى وأظمن وأثبت , لأنه المسجد بالبنيان ما يتأثر لا بالحرق ولا بالغبار ولا السرقه, لكن الكيربي ممكن (بدرنفيس) واحد يتفلل المسجد ويسرق..!!!

بذمتك ... الأسباب مو واقعيه ؟

أتمنى أكون أقنعتك بالأسباب يا هايف :) , عاد ما وصيك , بلغ ربعك الأسباب علشان يخفون علينا شوي من هالكيربيات الي ملت الديره ..

*الخلاصة*

( يمكن واحد فيكم يقول بأن كلام علي الدر توهين للمساجد!! وأنا أقول أكبر توهين لبيوت الله أنه أحنا بيوتنا قصور وفلل وبيت الله كيربي!!)

إنتهى